Sta toseta la se ciama Luisa Marsaro Reolon, la ga 9 ani e la vive a 10.000 chilometri de distansa dal nostro Veneto; no la ze mai stà ne la tera dei so veci ma la parla on veneto che tanti zovani veneti de la so età i se lo sogna … E gavì visto che bel modo, che sestin … e come che la pronunzia ben le parole, parole che qua gavemo perso.
LEGGI SU SERENISSIMA.NEWS La guerra di Cambrai, l’ultimo libro di Beggiato: quando la Serenissima da sola affrontò l’Europa intera
No la se vergogna de resitar na poesia in talian (veneto-brasilian) ansi, la lo fa co tanto orgolio e co tanto amor … la ze na poesia de padre Giovani Leonir Dall’Alba (1938-2006) ke el ga lassà tante poesie e tanti libri sora la siviltà dei veneti che ze emigrà in Brasile.
Parlemo de la quinta, ormai sesta generasion de discendenti de i nostri fradei veneti che quando che ze rivà l’Italia i ga dovesto andar in zerca de fortuna ne la Merica … co on bilieto de sola andata … i ghe fasea credere di trovar la tera de la cucagna … inveze fame, miseria e disperasion anca là … Ma i veneti (e anca on puchi de trentini, furlani e lombardi) laorando dì e note i ze riuscidi a farse strada e a far su on altro toco de Veneto in t’el Brasile.
Qua semo a Serafina Correa, e se parla talian
Qua semo a Serafina Correa, na sitadina de quindese mila abitanti del Rio Grande do Sul da dove ke ze nato tuto; qua nel 1988 el sindaco Sergio Massolini el ga fato na lege comunale e el talian el ze diventà lengua ufiziale par na setimana; da alora tanti tanti laori par far cresare el talian e nel novembre del 2014 el governo federal de Brasilia el ga riconosesto el talian come patrimonio imaterial del Brasile, la prima lengua dopo el portoghese-brasilian: on grasie grando a Paulo Massolini, dotor che el riva da la provincia de Vicensa, da parte de mare, e che el ga portà vanti on laoro tanto grando.
E anca al di de ancò tante inisiative, ghe ze radio che fa trasmision in talian, ghe ze concorsi musicai, che ze feste de piassa, ghe ze concorsi de cusina par sajar i magnari de na volta, ghe ze zovani come Edgar Marostica che fa da animator, regista, e che el ga registrà anca la Luisa.
LEGGI SU SERENISSIMA.NEWS Napoleone e il paese cancellato: le insorgenze, una storia veneta censurata
Eco, quando che i me dimanda come ke i ze mesi i brasiliani de origine veneta, mi ghe farò scoltar sta poesia … la vae de pì de mile discorsi …
On strucon forte, forte bravisima e beissima Luisa, on strucon grando a tuti i veneti-brasiliani che, giorno par giorno, i difende la nostra lengoa, la nostra siviltà veneta.
