Sta qua ze massa bela, e te pareva che a descoverzarla no jera Etore Beggiato…
El 31 de majo ghe ze elezion in Istria, a Torre. Le elezion de la Comunità dei italiani del paese. Ma sicome ciamar zente a votar no ze mai cussì semplice, anca a Torre, in Istria, i gà da parlar ne la so lengua, cussì i se capisse.
I fa girar sie locandine: No mancar! Vien votar!
Le locandine in istroveneto
Ste locandine ze una più bela de st’altra. E tute ze scrite in istroveneto, la variante istriana de la lingua veneta, che po’ ze na lengua veneta spuada, storica, come el triestin, come el fiuman. No in italian. In lengua veneta. La lengua che par qualche inteletual nostran no esiste, e del resto par lori gnanca el popolo veneto esiste, semo tuti italiani e basta, fioi de Garibaldi e de Vitorio Emanuel, tuti compagni dae Alpi ae Piramidi, e la Serenissima jera na republicheta marinara come Amalfi. Tuti italiani e basta. E invese varda un fià, quando che in Istria i vol capirse, quando che i vol parlar al cuor de la so zente, i parla in veneto. In istroveneto.
I parla in veneto, e i difende la so lengua, i dize grassie ai so veci che i ghe la gà insegnada in famegia.
Varda qua co bele ste locandine dei nostri fradei veneti istriani de Torre:
La lingua dei nostri veci
La lingua dei nostri veci, i scrive. Le note dei nostri noni. Quele robe che ne strenze el cuor, e che ne fa essar quei che semo. Quei veneti ostinai che semo:
I nostri veci gà difeso la lingua
anca quando no jera facile parlarla
I gà resistido parché i saveva
che senza lingua un popolo
se perdi.
Adesso toca a noi
Ndé votar, zente de Torre. Ndé votar, par ndar vanti sempre. Gavevimo bisogno de vualtri, par capir che fortuna che ghemo vùo, par capir quanto che val la nostra identità de veneti, de qua e de là del Golfo de Venezia, e anca più in zò, navigando da la parte che se leva el sol.
Volemo che la lingua dei vostri veci, a Torre, in Istria, e in tute le tere de San Marco, sia anca la lingua dei vostri fioi e dei vostri nevodi!
Alvise Fontanella
